Mundarterzählungen

von Hans Niedermayer

De Seppi war mei gute Freind

Ich  sin  noch  gar  net  in  die  Schul  gang,  dann  han  ich  mich  mit m  Seppi  gut  verstan,  er  war  mei  eerschte Kumrad,  der  mer  gholf  hat, wann  die  größeri  Buwe  mit  mir  Raafe   han  wille.  Er  war  aach  um  phaar  Johr  Älter wie  ich,  un  er  is  schun  domols  mehr  newer  die Schul  wie  in  die  Schul  gang.  Er  hat  immer  behaupt,  dass  mer im  Lewe  net  so  viel  lerne  muss,  weil  em  jo  des  nicks  helft  wann  mer doch  khe  Geld  hat.  Mei  Motter  hat  des gar  net  so  gere  gsiehn  weil  ich  mit m  Seppi  so  viel  verkehre  tu,  sie  hat  gsaat  das  ich  vun  dem net  viel  lerne kann.

Ob  wohl er  Älter  wie  ich  war,  is  er  mit  mir  in  eener  Klass  in  die  Schul  gang.  Wann  mol  im  Fruhjohr  die Sunne a  bisl  warm  gscheint  hat, noh  is  er  nimi  in  die  Schul  kumm,  dernoh  is  er  phaarmol  dorch  gfall.  Er  hat  oft  dem Lehrer  gar  net  gfolcht.  Ich  kann  mich  Erinnere  doo hat  de  Lehrer  die  Schiller eenmol gfroht  welle  Taa  noh  em Samschta  kummt.  De  Seppi  hat  des  gwisst  un  hat  sich  aach  es  eerscht gmellt,  in  dr  nächschti  Stund  hat  de Lehrer  nochmol  die  Schiller  gfroht,  wer  wees  wieviel  Täch  die  Wuch  hat,  dann  hat  sich  schun wieder  de  Seppi zu  eerscht  gmellt,  aach  desmol  rum  hat  er  es  gwisst.  De  nächschte  Taa  hat  de  Lehre  de  Seppi  gfroht  wieviel das  nein mol  acht  is,  dann  hat  de  Seppi  gsaat,  Herr  Lehrer  bis  jetz  han  ich  mich  immer  zu  eerscht  gmellt,  jetz solle  sich  mol  die  anri  Melle. De Lehre  hat  khe  Gspass  verstan  un  hat  em  Seppi  a  harti  Stroof  gin.

Die  Zeit  is  vergang,  un  de  Seppi  is  doch  mol  aus  dr  Schul  geblieb,  er  is  jo  nein  Johr  lang  in  die  Schul  gang, hat  awer  nor  sechs Klasse  fertich  gmacht.  Er  hat  gsaat  das  die  im  vor  sei  Lewe  reiche,  er  hat  Lese   un  aach schreiwe  kenne,  mehr  brauch  er  net,  hat  er gsaat.  Er  hat  awer  khe  Lehrmeister  in  dr  Stadt  gfun  der  ne  in  die lehr  holle  hat  wille,  alli  han  se  gsaat,  wann  er  sich  irgend  wu Vorgstellt  hat,  dass  sei  Note  in  seim  Schul Zeignis  viel  zu  schwach  sin  vor  die  Profesion.

De  Seppi  hat  sich   noh  bei  seim  Onkl als  Lehrbu  Anstelle  glosst,  der  hat  a  Schmied  Werkstatt  im  Dorf  ghat, un newebei  hat  er  noch phaar  Jocher  Feld  un  Viech  ghat,  des  dorchs  Johr  Versorcht  hat  misse  gin.  Darum  hat  des Lewe  sich  vor  de  Seppi  total  verännert.  Er hat  a  jede  Morjet  ganz  fruh  aus m  Bett  misse,  weil  er  deni   Schwein un  dem  anri  Viech  im  Hof   ihre  Stall  sauwer  gmacht  hat,  un  zu fresse  han  die  aach  misse  krien. Un  noh  dem Fruhstuck  hat  er  in  dr  Werkstatt  helfe  misse. Doo is  dem  Seppi wenich  Zeit  geblieb  vor anri Sache  noh  gehn, Awer  de  Seppi  hat  am  beschte  gwisst,  bei  wem  im  Garte  zeitichi  Kersche  un  aneres  Obst  zu  holle  war,  er  hat sogar, bei  seim  Meister im  Strohschower  Kitte  un Äpl  Verstecklt  ghat,  dass  er  a  Vorrot  vor  de  Winter  hat.Er  is gere  zu  eener  Tanz  Unnerhaltung gang,  vun  deni  es  awer  in  dr  domolichi  Zeit  wenich  gin  hat.  Er  hat  sogar  dr Hausfrau  in  dr  Kuchl  gholf,  un  hat  sich  oft  mit  der  eenzichi Tochter  vun  seim  Meister  geneckt.  Dann  sin  mol eenmol  Morjetz  die  Schandare  kumm,  un  han  de  Seppi  zamm  mit m  Meister  seiner Tochter  Verhaft,  un  han die mit  noch  viel  Leit  aus m  Dorf  uf  Sibirien gfiehrt.  Zurück  is  de  Seppi  vun  dorte  nimi  kumm,  er  is  in  eener Kohlegrub  vun  eem  große  Staan  zamm  gedruckt  gin.  Ich  denk  oft  an  de  Seppi,  weil  er  immer  froh  war,  un  sich khe  Sorche  um  de nächschte  Taa  gmacht  hat.

Hans  Niedermayer

Nov 2015
Aug 2015
Apr 2015
Mar 2015
Nov 2014