Mundarterzählungen

von Hans Niedermayer

Unser Nochbersch Leit

De  Vetr  Stoffl  un  sei  Weib  Wohne  bei  uns  in  der  Gass  glei  um  de  Ecke  rum  es  zweiti  Haus.  Un  weil  in  so  ener  greßeri  Stadt  viel fremdi  Leit  sin,  han  mir  uns,  weil  sie  halt  ach  Schwowe  Leit  sin,  schnell  gfun  un  han  uns   ach  schnell   als  guti  Nochbersch  Leit betracht.  De  Vetr  Stoffl  un  sei  Weib  ware  um  a  phaar  Johr  älter  wie  mir  gwen,  un  sin  ach  um  phaar  Johr  eher  wie  mir  do  ins   Land ingwanert  kumm. Mir  han  uns  gut  verstan  mit  ihne,  un  sin  ach  oft  Owets,  noh  dr  Arweit,  eene  zum  anere  Maje  gang,  un  han  gar  oft vun  drhem  verzählt,  drbei  sin  zumeischt  bei  unser  Weiwer  die  Träne  vun  die  Backe  runer  gekhurglt,  weil  se,  wie  mir  ach,  Hemweh  ghat han.  Die  Zeit  is  awer  vergang  un  hat  die  Krankheit  so  langsam,  saat  mer  halbwegs  ghaalt. De  Vetr  Stoffl  un   sei  besseri  helft  Wohne  in em  Haus,  des  em  Dokter  gheert,  un  in  dem  Haus  tun  se  newebei  alles  in  Ordnung  halle,  un  weil  se  fleisich,  Erlich  un  Ufrichtich    ware, hat  dem  Dokter  sei  Vatr  em  Vetr  Stoffl  un  seim  Weib  a  Urlaub  in  Valentia  versproch.  Der  Hausherr  hat  dorte  a  eigenes  Ferienhaus,  an dem   a  neihe  eisene  Zaun  uf  gstellt  soll  were,   un  do  derfe  se  ganzi  verzehn  Täch  umasunscht  Wohne,   un  den  Zaun  ufmontiere  helfe, sogar  die   Fahrt  mitm  Flieger,  hin  un  her,  hat  der  Hausherr  ihne  spendiert.  Dess  Haus  hat  phaar  metr  vun m  Meer  gstan,  so  dass  se sich  ach  manichsmol   abkhiele   han  kenne.  Dess  war  schun  a  freit  vor  alli  zwei.  Sie  han  kaum  die  Zeit  erwarte  kenne  bis  mol  de  fescht gsetzte  Taa  do  war,  dass  se  mol  wech  fliehe  kenne.

Die  Zeit  is  ach  schnell  vergang,  do  hat  de  Vetr  Stoffl   schun  mit  seim  Weib   un  Bagaasch  an  em  Sunniche  Morjet  am  Nirnberger Flughafn  gstan  un  han  gwart.  Dann  sin  se  endlich  mol  in  so  a  klenere  Flieger  ingstie,  der  se  bis  Minchen  gebrung  hat. Dorte  sin  se schun  in  a  viel  greßere  Flieger  ingstie,  der  is  dann  bis  uf  Malorka  gfloo,  weil r  khe  Erlaubnis  bis  Valentia  ghat  hat.  In  Malorka  sin se wieder  in  so  a  klener  Probeller  Flieger  in  gstie,  un  sin  dann  endlich  in  Valentia  ankumm.  Dem  Dokter  sei  Vater  hat  se  dorte  schun  mit seim  eigene  Auto  gwart,  un  ach  glei  bis  in  des  Ferien  Haus  gfiehrt.  Ja  du  liewer  Gott,  hat  em  Vetr  Stoffl  sei  Weib  gsaat,  wie  se  an dem  Haus  ankumm  sin,  do  is  jo  mehr  Arweit,  wie  unser  Hund  Fleh  hat.  Schun  de  nächschte  Taa  hat   de  Vetr  Stoffl  un  dem  Dokter  sei Vatr  sich  an  die  Arweit  gmacht.  

Derweil  die  Männer   de  ganze  Taa  fleisich  gearweit  han,  hat   em  Vetr  Stoffl  sei  Weib  ihne  a  jede  Taa es  Mittach  Esse  gekocht.  Es  hat awer  mehr  wie  zwei  Wuche  gedauert  bis  sie  den  Zaun,  un  die  aneri  Sache  am  Haus  halbwegs  fertich  kriet  han. Wie  se  sich  noo  am letschte  Taa  aus  geruht  han,  saat  uf  mol  dem  Dokter  sei  Vatr  iwer  de  Vetr  Stoffl,  so  gut  Gess  han  ich  schun  lang  net,  so  wie  enger Weib  in  denni  drei  Wuche  gekocht  hat,  hat  sie  vielleicht  in  em  Restaurant  garweit  bevor  ihr  uf  Deitschland  kumm  seit?  Ne  nee,  saat  de Vetr  Stoffl,  die  Weiwer  was  ausm  Banat  kumme  kenne  alli  so  gut  Koche.  Na  dann   muss  se  awer  mei  Weib  aach   so  Koche lerne, iwerhaupt  de  gezohene  Kerwus  Strudl  Ess  ich  stark  gere. Dem  Dokter  sei  Vatr  hat  noo  de  Vetr  Stoffl   un  sei  Weib,  am  nächschte Morjet, schun  wie  noch  netmol  die  Sunne  gscheint  hat  uf  Valentia  an  de  Flughafn  gfiehrt,  hat  ihne  guti  fahrt  gwunsch  un  is  zurück  gfahr.  De Vetr  Stoffl  hat  derhem  in  ener  Staats  ferma  als  Buchhaltr  garweit,  un  hat  sich  so  in  allem  gut  aus  gekennt.  

Sie  han  sich  bei  ihre  Flug  Gsellschaft   erkundicht,  wann  der  Flieger  uf  Malorka  ab  flieht,  die  han  noh  gsaat,  dass  heint,  un  die  ganzi Wuch  gar  khe  Flieger  dort  hien  geht,  weil  des   Flug   Personal in  Spanien  un  Deitschland Streikt,  un  des  kann  daure.  Dann  is  ihre Menetscher  kumm,  un  hat  gsaat,  dass  noch  in  em  Flieger  Platz  wer  vor  zwei  Persone,  der  Flieht  awer  bis  Köln,  vun  dorte  kenne  se ejer  uf  Frankfurt, un  vun  dorte  bis  Nirnberg  kumme.  Es  is  awer  ganz  anerscht  verloff,  wie  sie  geplant  han.  Vun  Köln  han  se  in  a  Flieger in  steie  misse,  der  se  bis  Hamburg  gebrung  hat,  vun  dorte  sin  se  bis  Berlin  gfloh,  dann  sin  se  mit  em  annere  Flieger  in  München ankumm,  un  de  anere  Taa  sin  se  wieder  mit  em  klener  Flieger  in  Nirnberg  geland.  Leider  is  ihre  Bagasch  net  mit  ihne  Gfloh,  des  han se  ihne  phar  Täch  noh  gschickt. Wie  mer  noh  dem  Urlaub  de  Vetr  Stoffl  un  sei  Weib  gfroht  han,  was  se  dann  alles  gsiehn  han  in  deni drei  Wuche, noo  han  se  gsaat  net  so  gar  viel,  mir  sin  in  ganz  Deitschland  rum  kumm,  un  han  nix  gsiehn  wie  vun  owe  lauter  Wolke.

Hans   Niedermayer

Nov 2015
Aug 2015
Apr 2015
Mar 2015
Nov 2014