Mundarterzählungen

von Hans Niedermayer

Nor a Putzer

Wie  de  Kaschper  aus  dr  Schul  geblieb  is  war  er  grad  zwelf  Johr  alt  gwen,  er  wär  schun  liewer  noch  phaar  Johr  in  die  Schul  gang,  wann  des  lerne  net so schwer  gwen wär,  awer  in  dere  domolichi  Zeit  hat,s  net  mehr  wie  finf Klasse  gin.   Noh  dr  Schul  hat  er  zu  die  Baure  Diene  misse  gehn,  weil  er  noch  siewe  Gschwister  ghat  hat  die  kleener  wie  er  ware,  un  weil  sei  Elter  halt  wenich  Vermehe  ghat  han.  Seiner  Motter  ihre  Taafphat,  der  a  guti  Wertschat  ghat  hat,  un  aach  weit  iwer  zwei  Dutzent  Jocher  Feld  ghat  hat,  war  willich  for  de  Kaschper  als  kleene  Knecht  instelle. Leicht  war,s  net  bei  so  eem  Bauer  Knecht  zu  sin,  im  Summer  war  die  Nacht  zu  korz   for  Ausruhe,  un  im  Herbscht  han  em  die  Fieß  gebrummt  vun em  Pluch  un die  Ross  im  Acker  nohlaafe .  Awer  so  viel  Zeit  is  schun  im  Winter  geblieb,  vor  aneri  Kulegre  ufsuche.

Weil  jo  die  Knechte  in  dere  domolichi  Zeit  im  Stall  bei  die  Ross  Schloofe  han  misse,   darum  han  se  aach   immer  noh  die  Ross  gstunk,  un  sin net  immer  gere  gsiehn  gin,  bei  so  eener  Gsellschaft,  wo  sich  die  Jungi  Mädle  un  Buwe  im  Winter  getroff  han.  Noh  eener  Zeit  hat  de  Vettr  Josep,  so  hat  em  Kasper  sei  Grundherr  gheest,  es  Feld  seini  zwei  Buwe  ufgetaalt,  un  de  Kaschper  hat  sich  a  aneres  Platz  suche  misse.  Er  hat  a  Anstellung  beim  Zwicklbauer  gfun,  der  awer  auserem  Dorf  gwohnt  hat,  awer  aach  besser  Gezahlt  hat.  Der  hat  auser  seim  Feld  noch  Zweihunnertfufzich  Schoof  ghat. Doo  is  de  Kaschper  iwerhaupt  aus  dr  Arweit  niemols  rauskumm.  Im  Summer  hat  mer  die  Hottararweit  mache  misse,  un  im  Winter  hat  mer  bei  die  Schoof  die  vieli  Arweit  ghat. Un  gstunk  hat  de  Kaschper  dann  aach  noch  vun  die  Schoof.

Es  war  a  großi  Erleichterung  vor  de  Kaschper,  dass  er,  mit  sei  anri  Kummrade  aus,m  Dorf,  die Einberufung  kriet  hat,  vor  sei  Militärischi  Ausbildung  mache. Wie  der  Taa  an  de  Himml  kumm  war,  wu  er  sich  beim  Tscherck  Melle  hat  misse,   hat er sei  Sunntagsiches  Gwand  un  sei  neiji  Patschker  angezoh  un  is  zu Fuß  in  die  Stadt  zum  Tscherck  gang.  Dorte  hat  er  vieli  vun  seini  Rekrute  gsiehn,  awer  ganz  wenich  gekennt.  Viel  Rede  hat  mer  jo  dorte  beim  Tscherk  net  kenne,  weil  alli  glei  in  verschiedeni  Regimenter  ingetaalt  gin  sin.  De  Kaschper  is  noch  mit  a  phaar  vun  seini  Kummrade  uf  Großwardein  zu  eem  Infantrie  Regiment  abkommandiert   gin. Un  weil  er  mit  die  allgemein  Kenntnise  net  gut  beschlaa  war,  un  aach  die  Ausbildung  hat  bei  ihm  gar  net  angegriff, dann  is  er  vor  Putzer  zu  eem  Owerleitinant  zugetaalt  gin.  Der  Owerleitinant  hat  zwei  Ross  ghat,  die  de  Kaschper  versorche  hat  misse.  Dem  sei  Stiwle  un  sei  Uniform,  hat  er  aach  sauwer  halle  misse.  Mit  eem  Wort  gsaat,  er  war  vor  alles  zuständich.  Es  hat  gar  net  so  lang  gedauert  hat  der  Ofizier  schun  bemerkt,  dass  de  Kaschper  a  anständiche  Bu  eener  is,  bloos  im  owere  Stock  hats  net  so  gut  funktioniert.  Doo  hat  sich  awer  der  hart  Gschnied.  De  Kaschper  hat  de  Spitzbu  im  Buse  ghat  un  war  mit  alli  Salwe  gschmiert.  Doo  hat  sich  zugetraa  das  der  Owerleitinant  vor  phaar  Täch  uf  Klausenburg  zu  eener  Schulung  fahre  hat  misse.  Des  hat  de  Kaschper  ausgnutzt,  er  hat  dem Owerleitinant sei  Muntur  angezoo, die  er  noch  im  Kaschte  ghat  hat,  wie  er  in  dr  Ofizier  Schul  war,  un  is  an  dem  Owet  in  die  Stadt  Spaziere  gang.

Er  is  in  eener  Kaffeebar,  die  ganz  am  End  vun  dere  Stadt  war,  mit  eem  junge  Mädl  etwas  näher  kumm, un  hat  dem  de  Kopp voll  gepapplt  un  hat gsaat,  dass  er  nor  ernschti  Absichte  hat.  Des   Mädl  war  so  vernewlt  vun,m  Kaschpr  seim  Verzähls  un  hat  den  glei  mit  hem  ghol,  derhem  bei  dem  Mädl  hat  sich  rausgstellt   das  es  aach  nor  a  Dienschtmädl  bei  eener  Ofizier  Familie  war. Die  han  awer  ach  schun  a    Heirathsfähiches  Tochter   ghat.  Bei  dere  Hausfrau  hat  de  Kaschper  sich  vor  a  Staabs  Feldwewl  Vorgstellt.    Sie  han  dann  den  Kasper  in  a  höcheres  Gespräch  Verwicklt,  un  hat  ne  uner  anerem  gfroht  was  for  Bildung  er  un  sei  Freindschaft  han.  De  Kaschper  hat  noo  gsaat  das  sei  Onkl  a  Musicher  is.,  un  das  der  a  jede  Morjet  in  dr  mitte vun  ihrem  Dorf  a  Konzert spielt.  Dernoo  hat  se  den  Kasper  gfroht,  ob  sei  Onkl  a  Dirigent  is,  un  ob  er  Kammermusich  macht. Ne  ne  saat  noo  de  Kaschper,  sie  sin  ihre  Sechs  Leit  un  han  alli  Patschker  an  wann  se  spiele.  Des  Weib  war  ganz  erstaunt  wie  se  des  gheert  hat.  In  wirklichkeit  war  em  Kaschper  sei  Onkl  Kuhhalter  im  Dorf,  un  han  jede  Morjet  in  dr  mitte  vun m  Dorf  angfangt  mit  ihre  Thutl zu  Bloose,  dass  die  Leit  Wisse  vor  ihre  Viech  naus  losse.

Noh  dem  Owet  wie  de  Kasper  sich  mit  eem  falsche  Name  beinoo  zu  viel  getraut  hat,  dann  hat  er  sich  nimi  bei  dem  Mädl  gsiehn  glosst.  Un  weil  des Dienschtmädel  sich  in  de  Kaschper  Vergafft  ghat  hat,  war  im  Haus  khe  frohi  Stund  mehr  an  de  Himmel  kumm. Vun  wu  hätt  de  Kaschper  Wisse  selle,  dass  die  Tochter  vun  dem  Haus  in  Wirklichkeit  seim  Owerleitinant  sei  Braut  is  Der  hat  awer,  wie  er  hemkumm  war  un  gheert  hat  das  de  Kaschper  sich  uner  eem  falsche  Name  in  dr  Stadt  rum  getrieb  hat,  un  noo  noch,  dann  bei  seiner  Braut   im  Haus  aach  des  gmacht  hat.  hat  er ne  vor  zwei  Wuch  in,s  Regiment  Arescht  insperre  glost,  das er  lernt  sich  niemehr  vor  a  anre  ausgin.  Uner  dere  Zeit  hat der  Owerleitinat  die  Tochter  vun  dem  Haus  Gheirat. Un  hat  dem  Kaschper  die  Dummheit,  was  der  gmacht  hat  verzeiht. Wie  de  Kaschper  schon  a  längeri  Zeit  wieder  im  Dienscht  war  un  sei  Ofizier  schun  drei  Monat  Verheirat  war,  hat  die  Jungi  Frau  iwer  de  Kaschper  gsaat,  sie  hat  die  Katze  so  gere,  doo  mecht  se  halt  das  de  Kaschper  ihre  a  scheeni  un  a  Zimmer  reine  Katz  verschaffe  mecht. De  Kaschper  hat  ihre  versproch  das  er  den  Wunsch  was  se  hat,  ganz  ernscht  ausfiehre  wert. Er  hat  garnet  so  lang  gebraucht,  bis  er  mol  an  eem  Owet  a  scheeni  un  hamlichi  Katz  hem  gebrung  hat.  Die  freid  was  die   ghat  hat,  kann  mer  bal  garnet  beschreiwe,  sogar  der  Owerleitinant  war  froh  mit  dere  Katz.  Die  Freid  hat  gar  net  so  lang  anghall.  Doo  is  mol  dem  Regimentz  Kummandant  sei  Weib  mit  dr  Kaless  langscht  gfahr,  grad  wie  die  Katz  im  Fenschter  glee  hat  vor  ausruhe.  Die  hat  a  Schreier  rausglosst,  weil  se  ihre  Katz  gekennt  hat,  die  vor  eener  längeri  Zeit    verschwun  war.  Es  hat  gar net  so  lang  gedauert  is  der  Owerleitinant  schun  wesich  zum  wievielschti  mol  vor  de  Regiment  Kummandant  gelaad  gin,  weger  em  Kasper  sei  Dummheite  was  der  immer  angstellt  hat.  Dorte  hat  er  sich  Rechtfertiche  misse,  weger  dere  Katz,  dann  hat er  a  harti  Stroof  uf  gebrummt  kriet.  De  Kaschper  is noo vor  Putzer  entloss  gin,  un  hat  sei  ganzi  Militärzeit als  eenfache  Soldat  vor  Krumbierschäler  in  dr  Regiments  Kuchl  mache  misse.

Hans  Niedermayer

Nov 2015
Aug 2015
Apr 2015
Mar 2015
Nov 2014